హయత్‌నగర్‌: పార్కింగ్ చేసిన కారులో మంటలు.. ఎలా జరిగింది?

Car Catches Fire in Hayathnagar

హైదరాబాద్‌, హయత్‌నగర్‌లోని శంకర్ నగర్ కాలనీలో సోమవారం ఒక కారులో అకస్మాత్తుగా మంటలు చెలరేగడంతో స్థానికులు భయాందోళనకు గురయ్యారు. ఈ ఘటన సమయంలో పెద్ద శబ్దం రావడంతో వారు తీవ్ర ఆందోళన చెందారు. ఈ ప్రమాదంలో కారు పూర్తిగా కాలిపోయింది. 

చాలా కాలంగా వాడకపోవడంతో ఆ కారును పక్కన పెట్టి ఉంచినట్లు యజమాని తెలిపారు. అయితే, ఈ ఘటనలో ఎవరికీ ఎటువంటి గాయాలు కాకపోవడంతో అందరూ ఊపిరి పీల్చుకున్నారు. కారులో మంటలు అంటుకున్నప్పుడు బాంబు పేలుడు తరహాలో పెద్ద శబ్దం వచ్చిందని, అసలు ఏం జరుగుతుందో తెలియక తాము భయపడ్డామని స్థానికులు చెప్పారు. 

ఈ ఘటనలో శంకర్‌నగర్‌ మాధవ రెడ్డి అనే వ్యక్తికి చెందిన ఈ కారు పూర్తిగా మంటలకు ఆహుతి అయ్యింది. కారును ఎవరో ఆకతాయిలు కావాలనే తగలబెట్టి ఉంటారని కారు యజమాని అనుమానం వ్యక్తం చేస్తున్నారు. ఘటనపై సమాచారం అందుకున్న పోలీసులు అక్కడికి చేరుకుని పరిస్థితిని పరిశీలించారు. కారు దగ్ధమైన తీరుపై పోలీసులు దర్యాప్తు చేపట్టారు.