టాలీవుడ్ ప్రముఖ నిర్మాత, నైజాం డిస్ట్రిబ్యూటర్ దిల్ రాజు మరోమారో ఓ ఇంటివాడయ్యారు. గత 2017లో ఆయన భార్య అనిత అనారోగ్య కారణంగా చనిపోయారు. అప్పటి నుంచి ఆయన ఒంటరి జీవితాన్ని అనుభవిస్తూ వచ్చారు. ఈ క్రమంలో తన కుమార్తెకు హన్షితకు వివాహం చేసిన దిల్ రాజు.. తాను మాత్రం పెళ్లి చేసుకోలేదు.
అయితే, తన కుమార్తె హన్షితతో పాటు కుటుంబ సభ్యులు ఒత్తిడి మేరకు రెండో పెళ్లి చేసుకునేందుకు సమ్మతించారు. పైగా, రెండో పెళ్లి కోసం వధువును కూడా తన కుమార్తె హన్షితనే ఎంపిక చేసింది. ఆమె దిల్ రాజుకు కూడా నచ్చారు.
ఫలితంగా ఆదివారం రాత్రి 11 గంటల ముహూర్తానికి నిజామాబాద్ జిల్లా నార్సింగపల్లిలోని శ్రీవేంకటేశ్వర స్వామి ఆలయంలో దిల్ రాజు రెండో పెళ్లి కుటుంబ సభ్యుల మధ్య జరిగింది. అదీ కూడా అంతర్జాతీయ మాతృదినోత్సవం జరగడం యాదృచ్ఛికం కావడం గమనార్హం.
మరోవైపు, దిల్ రాజు పెళ్లి చేసుకున్న రెండో భార్య ఓ మాజీ ఎయిర్‌హోస్ట్. పైగా, బ్రాహ్మణ సామాజిక వర్గానికి చెందిన మహిళ. అయితే, ఆమె పేరు, ఊరుతో పాటు ఇతర వివరాలు మాత్రం తెలియాల్సివుంది.
కాగా, ప్రస్తుతం దిల్ రాజు రెండో పెళ్లి వివాహ ఫోటోలు ఇపుడు సోషల్ మీడియాలో వైరల్ అవుతున్నాయి. అనేక సినీ సెలెబ్రిటీలు దిల్ రాజు దంపతలకు శుభాకాంక్షలు తెలుపుతున్నారు.
