ఎండాకాలంలో మేకప్ చెరిగిపోతోందా.. అయితే ఇలా చేయండి..

శీతాకాలం పోయి ఎండాకాలం వచ్చేసింది. ఇంకా ఏప్రిల్ నెల కూడా మొదలవక ముందే ఎండలు భగభగమంటున్నాయి. ఇక స్నానం చేసినంత సేపు కూడా ఫ్రెష్‌గా ఉండటం లేదు. పది నిమిషాలకే చెమటతో ఒళ్లంతా తడిసిపోతోంది.

ఎండాకాలం కాబట్టి మేకప్ వేసుకున్నా చెమట వలన పూర్తిగా పోతుంది లేదంటే ముఖంపై ప్యాచ్‌లుగా కనిపిస్తుందని చాలామంది ఎండాకాలంలో ఎక్కువగా మేకప్ వేసుకోవడానికి ఇష్టపడరు. కానీ శుభకార్యాలు ఎక్కువగా జరిగే సీజన్ కాబట్టి వేసుకోక తప్పని పరిస్థితి. అలాంటప్పుడు క్రింది జాగ్రత్తలు తీసుకుంటే మేకప్ ఎక్కువ సమయం చెరిగిపోకుండా మీ అందాన్ని ఇనుమడింపజేస్తుంది.

మేకప్‌కి ముందు క్లెన్సర్‌తో శుభ్రంగా ముఖాన్ని తుడుచుకుని, ఆపై ఎండాకాలం కాబట్టి మిగతా సీజన్లలో మాదిరిగా కాకుండా లైట్ మేకప్ వేసుకోవాలి. జిడ్డు చర్మం గలవారు మేకప్‌కు ముందు ఆయిల్ ఫ్రీ ప్రైమర్‌ను రాసుకుంటే చెమట పట్టినా కూడా ముఖంపై తెల్లని ప్యాచ్‌లు కనిపించవు. ఎండలో తిరిగినా కూడా చెరిగిపోకుండా ఉండేందుకు కంటికి వేసే మేకప్‌లో అన్నీ వాటర్ ప్రూఫ్ ప్రాడక్ట్స్‌ను వాడాలి. 

ఈ సీజన్‌లో ముందుగా పెదాలకు లిప్ బామ్ రాసి, ఆ తర్వాత లిప్‌స్టిక్‌కు బదులుగా లిప్ గ్లాస్ వేసుకుంటే మంచిది. ఎలాగూ చర్మ సంరక్షణ కోసం సన్ స్క్రీన్ లోషన్‌లు ఉండనే ఉన్నాయి. బయటికి వెళ్లేటప్పుడు వాటిని రాసుకోండి. ఈ లోషన్‌లో ఫౌండేషన్ క్రీమ్‌ను కలిపి అరగంట ముందు రాసుకుంటే ఎండ వేడిమిగా మేకప్ చెరిగిపోకుండా ఎక్కువకాలం ఉంటుంది.