భారత్‌లోకి మరో కొత్త కరోనా వేరియంట్ కాలు పెట్టినట్టు నేషనల్ ఇన్‌స్టిట్యూట్ ఆఫ్ వైరాలజీ తాజాగా గుర్తించింది. బ్రెజిల్, ఇంగ్లండ్ నుంచి భారత్‌కు వచ్చిన ప్రయాణికుల్లో దీన్ని గుర్తించామని పేర్కొంది. ఈ కొత్త వేరియంట్ శాస్త్రీయ నామం బీ.1.1.28.2. ఈ వేరియంట్ వల్ల తీవ్రమైన సమస్యలు తలెత్తే అవకాశం ఉందని శాస్త్రవేత్తలు హెచ్చరించారు.
ప్రస్తుతమున్న కరోనా టీకాలు ఈ వేరియంట్‌ను నిర్వీర్యం చేయగలవో లేదో తెలుసుకునేందుకు మరింత అధ్యయనం జరగాల్సి ఉందని వారు చెప్తున్నారు. కాగా.. దేశంలో కరోనా రెండో వేవ్ వెనుక బీ.1.617 రకం వేరియంట్లు ఉన్నట్టు పది పరిశోధన శాలలు జరిపిన తాజాగా అధ్యయనంలో బయటపడింది. ఈ రకం వేరియంట్ తొలుత మహారాష్ట్రలో వెలుగులోకి వచ్చింది.
ప్రస్తుతం పశ్చిమ బెంగాల్, ఆంధ్రప్రదేశ్, ఢిల్లీ, గుజరాత్, తెలంగాణ రాష్ట్రాలోనూ ఈ వైరస్ ఉన్నట్టు శాస్త్రవేత్తలు చెబుతున్నారు. ఈ వేరియంట్‌కు చెందిన మూడు ఉపజాతులు అంటే..బీ.1.617.1, బీ.1.617.2, బీ.1.617.3 ప్రస్తుతం వ్యాప్తిలో ఉన్నాయి. వీటిలో బీ. 1.617.2 మిగితా వాటికంటే అత్యంత వేగంగా వ్యాపిస్తోంది. కరోనా రెండో వేవ్‌కు ఇదే ప్రధాన కారణమనే అభిప్రాయం నిపుణుల్లో ఉంది. ప్రపంచ ఆరోగ్య సంస్థ ఈ వేరియంట్‌కు 'డెల్టా' అని నామకరణం చేసింది.