డేరా బాబా దత్తపుత్రిక అలియాస్ ప్రియురాలికి బెయిల్...

డేరా బాబా దత్తపుత్రిక అని చెప్పుకునే ప్రియురాలు హనిప్రీత్ ఇన్సాన్‌కు హర్యానా కోర్టు బెయిల్ మంజూరైంది. అక్టోబరు 2017 నుంచి అంబాలా జైలులో జ్యుడీషియల్‌ కస్టడీలో ఉన్న ఆమెకు చీఫ్ జ్యుడిషియల్ మేజిస్ట్రేట్ (సీజేఎం) రోహిత్ వాట్స్ కోర్టు సాధారణ బెయిల్ మంజూరు చేసింది.

ఆధ్యాత్మిక ముసుగులో ఇద్దరు సాధ్వీలపై అత్యాచారం చేసిన కేసులో ఆధ్యాత్మిక గురువుగా చెప్పుకున్న గుర్మీత్‌ రామ్‌ రహీం సింగ్‌ను సీబీఐ కోర్టు దోషిగా తేల్చింది. ఈ కేసులో అతడికి జైలు శిక్ష విధిస్తూ న్యాయస్థానం తీర్పు వెల్లడించింది. 

అత్యాచారం ఆరోపణలపై రామ్ రహీమ్ సింగ్ దోషిగా తేలిన తర్వాత 2017 ఆగస్టులో హర్యానాలోని పంచకులాలో హింస చెలరేగింది. ఆగస్టు 25వ తేదీన జరిగిన అల్లర్లలో 29 మంది మరణించగా, 200 మందికి పైగా గాయాల పాలయ్యారు. ఈ క్రమంలో కేంద్రం నుంచి ఆర్మీని మోహరించి అల్లర్లను అదుపులోకి తెచ్చింది.

ఈ కేసులో హనీప్రీత్ ఇన్సాన్ ప్రధాన నిందితురాలు. ఆమెతో పాటు మరో 41 మందిపై దేశద్రోహం కేసు పెట్టి అరెస్టు చేశారు పోలీసులు. అక్టోబర్‌ 2017లో వారిని అంబాలా జైలుకు తరలించారు. లక్ష రూపాయల పూచీకత్తుపై ఆమెకు బెయిల్ మంజూరు చేయడంతో రెండేళ్ళ తర్వాత ఆమె జైలు నుంచి బయటకురానున్నారు.