శ్రీవారి ఆలయంపై విమానాల చక్కర్లు ఇక వద్దు-నో-ఫ్లై జోన్‌గా ప్రకటించాలి- బీజేపీ

తిరుమల ఆలయం మీదుగా విమానాలు తిరగడంపై కలియుగ ప్రత్యక్ష దైవం శ్రీ వేంకటేశ్వర స్వామి భక్తులు తీవ్ర ఆందోళన వ్యక్తం చేశారు. "లక్షలాది మంది హిందువులకు పవిత్రమైన ప్రదేశాలలో ఒకటైన తిరుమల ఆలయం పవిత్రత, ఆధ్యాత్మిక వాతావరణం రోజువారీ విమాన రాకపోకలతో చెదిరిపోతోంది" అని భక్తులు ఆవేదన వ్యక్తం చేస్తున్నారు. 

దీనిపై బీజేపీ నేత నవీన్ కుమార్ రెడ్డి తిరుమల తిరుపతి దేవస్థానం (టిటిడి) బోర్డును త్వరితగతిన చర్యలు తీసుకోవాలని, ఆలయ ప్రాంతాన్ని కఠినమైన "నో-ఫ్లై జోన్"గా ప్రకటించాలని కేంద్రాన్ని అభ్యర్థించాలని కోరారు. గతంలో విజ్ఞప్తి చేసినప్పటికీ, పౌర విమానయాన డైరెక్టరేట్ జనరల్ (డీజీసీఏ) లేదా పౌర విమానయాన మంత్రిత్వ శాఖ పవిత్ర తిరుమల ఆలయం మీదుగా విమానాలు ఎగరడంపై ఎటువంటి నిషేధాన్ని ప్రకటించలేదు.

ఆలయ ప్రాంగణం మీదుగా విమానాలు స్వేచ్ఛగా నడుస్తూనే ఉన్నాయి. ఇంకా నవీన్ కుమార్ రెడ్డి మాట్లాడుతూ, "ఇది కేవలం శబ్దం లేదా భంగం గురించి కాదు. ఇందులో ఆధ్యాత్మిక పవిత్రత, భద్రత, కోట్లాది మంది భక్తుల మనోభావాలు ఉంటాయి. తక్షణ, బలమైన చర్య అవసరం." అని నవీన్ విజ్ఞప్తి చేశారు. 

ఇంకా టీటీడీ చైర్మన్ బి.ఆర్.నాయుడు, బోర్డు సభ్యులు వెంటనే ముగ్గురు సభ్యుల కమిటీని ఏర్పాటు చేయాలని ఆయన కోరారు. తిరుమల ఆలయ ప్రాంతాన్ని నో-ఫ్లై జోన్‌గా ప్రకటిస్తూ అధికారిక, లిఖితపూర్వక సూచనలను పొందడానికి కమిటీ న్యూఢిల్లీకి వెళ్లి పౌర విమానయాన మంత్రి రామ్ మోహన్ నాయుడును కలవాలి. "ఈ విషయంలో ఆదేశాన్ని తిరుపతి విమానాశ్రయ డైరెక్టర్, ఎయిర్ ట్రాఫిక్ కంట్రోల్ (ATC)కి నేరుగా తెలియజేయాలి" అని బిజెపి నాయకుడు పేర్కొన్నారు. గతంలో, ఈ విషయంపై టిటిడి బోర్డు కేంద్రానికి ఒక లేఖ పంపింది. 

కానీ తిరుమల పుణ్యక్షేత్రం మీదుగా విమానాలు యథావిధిగా కొనసాగుతున్నందున దీని ప్రభావం లేదు. మరిన్ని నష్టం జరిగే వరకు మనం వేచి ఉండకూడదు. ఇది ప్రతీకాత్మకమైన చర్యలకు సమయం కాదు. బలమైన, స్పష్టమైన ఆదేశాలను యుద్ధ ప్రాతిపదికన అనుసరించాలి" అని నవీన్ కుమార్ రెడ్డి స్పష్టం చేశారు. 

విశ్వాసం, భద్రత రెండింటికీ సంబంధించిన అత్యవసర విషయంగా దీనిని పరిగణించాలని నవీన్ టిటిడి నాయకత్వం, ఉన్నతాధికారులకు విజ్ఞప్తి చేశారు. "అధికారిక నో-ఫ్లై జోన్ ఉత్తర్వులు జారీ చేయబడి, మరింత ఆలస్యం చేయకుండా అమలు చేయబడేలా చూసుకోవాలి" అని నవీన్ కోరారు.