రేపు దేవుడు ఏ పని అప్పగిస్తే ఆ పని చేస్తా : రజనీకాంత్
తమిళ సూపర్‌స్టార్ రజనీకాంత్ రాజకీయ రంగ ప్రవేశం చేయనున్నట్టు వార్తలు వస్తున్నాయి. ఈ అంశంపై తమిళనాట పెద్ద చర్చే సాగుతోంది. ఈ పరిస్థితుల్లో తమ అభిమాన సంఘాలతో రజనీకాంత్ సమావేశం కానున్నారు. రాజకీయ రంగ ప్రవ
తమిళ సూపర్‌స్టార్ రజనీకాంత్ రాజకీయ రంగ ప్రవేశం చేయనున్నట్టు వార్తలు వస్తున్నాయి. ఈ అంశంపై తమిళనాట పెద్ద చర్చే సాగుతోంది. ఈ పరిస్థితుల్లో తమ అభిమాన సంఘాలతో రజనీకాంత్ సమావేశం కానున్నారు. రాజకీయ రంగ ప్రవేశంపై అభిమానుల అభిప్రాయాలు సేకరించే నిమిత్తమే రజనీకాంత్ ఈ సమావేశం ఏర్పాటు చేయనున్నారనే గుసగుసలు వినిపిస్తున్నాయి.
దీనిపై రజనీకాంత్ స్పందిస్తూ.. ఇప్పటికి తాను నటుడినేనని, అందరికీ నచ్చే సినిమాలను చేసి రంజింపజేయడమే తన కర్తవ్యమని, రేపు దేవుడు తనకు ఏం పని అప్పగిస్తే అది చేసేందుకు సిద్ధంగా ఉన్నట్టు వ్యాఖ్యానించారు. రాజకీయాల్లోకి రావాలన్న ఉద్దేశం తనకు ఎన్నడూ లేదని చెప్పిన ఆయన, తప్పుడు వ్యక్తులకు దూరంగా ఉంటానని అన్నారు.
తనకు అభిమానుల అండ, వారి ప్రేమ, ఆప్యాయతలే పదివేలని, వివాదాస్పద ప్రకటనలు చేసి వారిని అయోమయంలోకి నెట్టివేయడం తనకిష్టం లేదని స్పష్టం చేశారు. తాను రాజకీయాల్లోకి రానున్నట్టు, వచ్చినట్టు జరుగుతున్న ప్రచారాన్ని నమ్మాల్సిన అవసరం లేదన్నారు.