పవర్ స్టార్ పవన్ కల్యాణ్ హీరోగా, కీర్తిసురేష్, అనూ ఇమ్మాన్యుయేల్ నటించిన సినిమా ''అజ్ఞాతవాసి''. ఈ సినిమా పవన్ కెరీర్‌లో చెత్త సినిమాగా నిలిచిపోయింది. దర్శకుడు త్రివిక్రమ్ ఇంత వరకు సంపాదించుకున్న బ్రాండ్ నేమ్ అజ్ఞాతవాసి సినిమాతో చెల్లాచెదురైపోయింది. అయితే బాక్సాఫీసు వద్ద బోల్తా కొట్టిన ఈ చిత్రం యూట్యూబ్‌లో మాత్రం దూసుకుపోతోంది.
ఆ రికార్డు సంగతికి వస్తే.. చెర్రీ, వంశీపైడిపల్లి కాంబోలో వచ్చిన ''ఎవడు''ను అదే పేరుతో హిందీలోకి అనువాదం చేసి యూట్యూబ్‌లో విడుదల చేశారు. ఈ సినిమా హక్కులను గోల్డ్‌మైన్ టెలీఫిలిమ్ సంస్థే కొనుగోలు చేసింది. ఆ తర్వాత గోవిందుడు అందరివాడేలే సినిమాను ఎవడు-2 పేరుతో ఇదే సంస్థ హిందీలో విడుదల చేసింది. ఈ రెండు సినిమాలు పది మిలియన్లకు పైగా వ్యూస్ సాధించాయి. ప్రస్తుతం ఇదే ఎవడు పేరుతో.. ఎవడు-3గా అజ్ఞాతవాసిని విడుదల చేశారు.
బయ్యర్లకు నష్టాన్ని మాత్రమే మిగిల్చిన ఈ చిత్రం ఆన్‌లైన్‌లో మాత్రం ఆల్‌టైమ్ రికార్డును క్రియేట్ చేసింది. ''అజ్ఞాతవాసి'' సినిమా హిందీ డబ్బింగ్ ఎవడు-3 పేరిట ఆన్‌లైన్‌ల విడుదల చేయగా, రెండు రోజుల్లో 2 కోట్ల మంది సినిమాను చూశారు. ఓ దక్షిణాది చిత్రం హిందీలోకి డబ్ అయి, 48 గంటల్లోనే ఇన్ని వ్యూస్ రావడం ఇదే తొలిసారి కావడం గమనార్హం. ఆ విధంగా పవన్ ''అజ్ఞాతవాసి'' ఓ అరుదైన రికార్డును సృష్టించింది.