షాపు కట్టాలంటే ఏ నియమాలు పాటించాలి...?

చాలామందికి బిజినెస్ చేయాలంటే చాలా ఇష్టంగా ఉంటుంది. ఐతే ఈ షాపులను ఎలా నిర్మించాలో తెలుసుకోవాలి. దక్షిణం ముఖంగా షాపు కట్టాలంటే ఏ నియమాలు పాటించాలి... అసలు దక్షిణ దిశగా షాపు పెట్టొచ్చా.. పెట్టకూడదా అనే విషయాన్ని తెలుసుకోవాలంటే.. ఇవి చూడండి.

దేశంలో దక్షిణ ముఖంగా వ్యాపార సంబంధమైన అధికార సంబంధమైన గృహ సంబంధ నిర్మాణాలు ఎన్నో ఉన్నాయి. అవి గొప్పగా సాగుతూ ఉన్నాయి. అది దిశను బట్టి కాదు వాటి నిర్మాణ విధానాన్ని బట్టి. నిర్మాణం బాగలేకపోతే ఏ దిశకైనా సాగవు. మీరు నిరభ్యంతరంగా దక్షిణ ముఖం షాపు కట్టుకోవచ్చు. ఆ షాపు రోడ్డు ఫేస్‌ను బట్టి దాని కొలతలో సగభాగం గ్లాస్‌తో మూయాలి. 

ఆ షాపును దక్షిణ ఆగ్నేయంలో రాకపోకల ద్వారా విశాలంగా పెట్టాలి. దక్షిణ నైరుతిలో తూర్పు ముఖంగా కూర్చునే విధంగా అరుగు వేసుకుని లేదా కుర్చీ వేసుకుని వ్యాపారం చేయాలి. మీ కుడిచేతి వైపు గల్లాపెట్టె ఉండే విధంగా అమర్చుకోవాలి. దక్షిణం షాపులో వాయవ్యం, ఈశాన్యం ఆగ్నేయాలలో కూర్చుని వ్యాపారం చేయవద్దు.