విశాఖ - హైదరాబాద్ వందే భారత్ ప్రయాణికులకు శుభవార్త!!

విశాఖపట్టణం - హైదరాబాద్ నగరాల మధ్య నడిచే వందే భారత్ రైలు ప్రయాణికులకు దక్షిణ మధ్య రైల్వే శుభవార్త చెప్పింది. ఇరు మార్గాల్లో 20707/20708 నంబర్లతో నడిచే వందే భారత్ రైలు బోగీల సంఖ్యను పెంచుంతున్నట్టు తెలిపింది. సాధారణ రోజుల్లో ఈ రైలుకు ప్రయాణికుల నుంచి అమితమైన డిమాండ్ ఉంది. దీనికితోడు సంక్రాంతి రద్దీ విపరీతంగా ఉంది. దీంతో ఈ రైలులోని అన్ని బోగీలు ప్రయాణికులతో కిటకిటలాడుతున్నాయి. ఈ రద్దీని నియంత్రించడంతో పాటు సంక్రాంతి పండుగకు ఊరెళ్లే వారి కోసం ఈ రైలు బోగీల సంఖ్యను పెంచుతున్నట్టు ద.మ.రైల్వే వెల్లడించింది. 

ప్రస్తుతం 8 కోచ్‌లతో ఈ రైలు నడుస్తుండగా, సోమవారం నుంచి మరో 8 బోగీలను అనుసంధానిస్తున్నట్టు పేర్కొంది. దంతో మొత్తం కోచ్‍ల సంఖ్య 16కు పెరగనుంది. అలాగే, ప్రస్తుతం 530 సీట్లు మాత్రమే అందుబాటులో ఉండగా, రేపటి నుంచి 1128 సీట్లు అందుబాటులోకి రానున్నాయి. 

కాగా, గత యేడాది మార్చి నెలలో ప్రధానమంత్రి నరేంద్ర మోడీ ఈ రైలును ప్రారంభించిన విషయం తెల్సిందే. ఈ రైలుకు ఒక ఎగ్జిక్యూటివ్ కోచ్, ఏడు చైర్‌కార్ బోగీలు ఉన్నాయి. తాజాగా 8 బోగీలను జోడిస్తుండటంతో ఎగ్జిక్యూటి కోచ్‌ల సంఖ్య 2కు, చైర్‌కార్‌ బోగీల సంఖ్య 14కు పెరగనుంది.